Khuado thu: Yangon teeng Thalmual Innkuan

User Rating:  / 0

Category: Thalmual

Created on Monday, 26 October 2009 13:29

Written by Dr. Thawng Khan Pau

Hits: 339

20090 Kum Yangon Teeng Thalmual Innkuan Khuado Pawi
October 24, 2009

Khuado Thu

Introduction:
Tuni Yangon a teeng Thalmual innkuan te’Khuado pwe bawltheih nading, hunhoih hunpha ongpia i biak Topa Pasian kiangah lungdamna ko nuam masa ing. Tua khit ciangin khuado pwe siim dinga ongpai mimal khempeuh tungah zong lungdam ong ko nuam ing. Hih bang khuado pwe lianpi i bawltheih nadingin annek tuidawn ongsik a, sponsor ong pia Dr.Do Za Dal te innkuan tung ah ahizongPa Hau Khan Pau te innkuan tung ah ahi zongin,Pa Kam Khan Nang@ Nangno leh Pa Cin Za Mungte innkuan tungah ahi zongin,Khuado annek ongsik (sponsors)te tung,  lungdamna lianpi omhi cih,ong gen nuam ing.Tua khit ciangin Khuado bawlna ding mun  phaltak a, inn hoih lo hoih mahmah,inn lianpi ong zangsak Bo.Pum Khan Pau te innkuan tungah zong lungdam nalianpi aom banah i Khuado pawi a dingin akilawm mahmah banaing (Back ground writing coulour) tawh ongzepsak nate hangin lungdam ong ko nuam ing..Tuabek thamlohin ankuanglui leh niangtuite ong hawm, Thalmual tanu te tung ah zong lungdam mahmah hi,cihthu ong pulak nuam ing.

Khuado hungeel na program omsa mah bangin tuni khuado thu le i Zo ngeina a theih huai pawlkhat gawmin ong gen nuam ing. Amasa in:

Zomite Khuado pwe pen nidang Kawlgam suahtak ngahma Mangkang kumpi in ong uk lai hunpawlin zong Khuado hun October (Khuado kha) pen Kawlgam minam tuamtuamte lakah Zomi kumkhenpawi or Khuado pawi ci-in ong ciapteh sak uh hi.Hih Khuado kha ong tun simin To Mangkang kumpi te’n kumpi nasemte kha khat sung tawntungbang akhuan  pia-in, i kumpi mahmah in zong Zomite kumkhen pawi leh Zo ngeina khat, in hong thupi ngaihsutsakin ciamteh uh hi.

Hih Khuado pawi pen Zomite Christian i suah mapek a kipan thupha ngetna leh lungdamlohna a, a neite i hihna pen, kumkhatin pawilian nih (Khuado & Sialsawm) i nei aa, tua ngeina pen Christian ih suah ciangin zong Pasian’ kiangah lungdamkoh thupha ngetna tawh kithuah, nuntakna  ngeina hoihkhat hi cileng kikhial lo ding in um ing.

1. Asepdan:
Khanglui lai-in khuado hun dingciangin sepding bawlding atuamtuam te khua up ate kikum khol in, akigin khol dingte panin:

• Meilah (Hih meilah pen khuadopi nima in khua lakna azatding in nungakte in kigingkhol uh hi.
• Phit (Khuai la a taangsuah cianga nungak tangvalte khauhual lenkawm a kimutding (phit kop tampi kiging khol uh hi).
• Tuuktungkhin lopan ante kila khin ahih manin khuado sung a nek leh dawn dingin nupi te in zu lim mahmah ding sakhol ding.
• Lopan an kila khin kipua khintek ahih manin asi, ahingte kha lobuk sung a, suangthu te kisawn pai ding.
• Khua siansuahna pawi zong kici ahih manin, "Dawihang, kauhang nam hang aw, na zun na ek namsia, nani nakha cingta,    nazi nata ten hong lam et zawh sawtta , nakhua  natui zuanin ci ding"

Hih khuado pawi leh X’tian kalsuan zia kituak teng i etciangin:

• Zomite kumlui kumthak khenna,
• Kumkhat sunglokhawh singpuak anlaknate, tungah Pasian in thupha ongpiak na lungdam kohding
• Mailam kum ading Thupha ngetnang,
• Siatna hongpia dawisia kausia te hawlkhiatna le siansuahna.

2. Ngimna:
a). Mailam a ding leh sihkhit a ding ngimna

b). A sisa nu le pa pi lepu te sam in kho ding

c). An laak khit ahih manin nek le dawn kicing mahmah ahih na.

Pasianthu tawh etkaakna:
a). Khuado pawi in anlaak pawi hi-in Kha thu ah zong ‘Rapture’ kici thei hi.

b). Mi Siangtho te laaktohna pawi tawh zong kibang hi.

c). Second coming cianga ahing, asi khempeuh thu um mite laktohna kha anlaak na pawi (Feast of Harvest) (Jer 8:20; Mtt 9:37-38: Rev.14:15 tawh kiban gige hi. Ps 126:5-6 ‘Khitui tawh khaici atuhte,lungdam a kikona tawh an lasak ta in, kapkawmin kuankhia in a tuh ding khaici apua mi lungdam a kikona tawh buhlomte pua-in inn ah hong ciah ding hi’

Hih khuado pwe ah zong asi ahing te akihel khop mahbangin Kha lakna pawi ah zong thu-um ahing laite leh asisate kikhela  sihtheihna pumpi (mortal man) pan (immortal man) silhin muattheihna pumpi pan,muatthei nawnlohna pumpi silha Topa tawh anlak pawi khaam ni tawh ( the tansformation of mortal to immortal) aki bang ahi hi. ( I Cor15:51-55).

3. Pawi ah asisate  le ahing laite kipawlkhawmna, an gui an gah hongpia, cidam ludamna hong pia, hong siam khuavak Pasian tungah lungdam kohkhopna ahih mah bangin, khalam thu ah zong vantunggam ah a sisa le a hinglai thu um kikhelte kum 1000 sung (Millenium Kingdom). Topa tawh man khopna pawi tawh zong a kibang ahi hi. Tua pawi ah naak lungdam mahmah ding uh hi. (Mtt 13:30,39; Rev 20:4-5).

4. Khuado pawi-in hong bawlsia thei dawi gilokau gilo nawh khiat na ahih mah bangin, khalam thu ah zong i galpa dawi mangpa le a pawlte, taw neilo guam (Bottomless pit) sungah khiatsuk a, kum tul  khat sung khumcipna, kolbulh khaukhihna tawh akibang ahi hi. Thu um mite kum tulkhat sung Topa tawh amankhoplaitak in satan pen kum tulkhat  sung khumcipna athuak ding ahi hi. Tua hun sung satan in khem ding mi kuamah om lo ding ahih manin sikkol kibulh in taang thei lo a, sep mel ding mahmah om lo, cimlua kisa in khuisasa ding hi. A khem ngei bangin mihng te khemnuamin kitomtom ding hi. (Rev 20:2,3).

5. Khuado pawi a bawl a, a khaam te thupha ngah hi a, a lunguh a dam mahmah bangin, Khalam thu ah hih kha anlak pawipen amasa thawhkikna hi a thupha ngah mi te ahih manin mi lungdamte ahi hi. (Great joy). Tua sung a kihel sihna in neukha beek a sukha loh dingte ahih manin thupha ngah mi taktak ahi hi.

6. Hih khuado pawi pen Kumkhenpawi zong kici a  hun   kikhenna ahi hi. Tuuk hun bei-in Phalbi hun hog tung hi ta hi. Tua mah bangin Khalam thu ah zong Leitung bei hun (World’s end) etsakna hi a, nikhat ni ciangin hih i tenna leitung hun bei ta ding a, thu-um mite in nuntak tawntungna mun vanthak, le leithak a luah tading ihi hi.

I Zo ngeina pawlkhat:
Ngeina i cih ciangin nopna dahna  te ah  i tatzia te, unau sanggamsung i kimatzia, gamtat luhekzia, kizopzia leh  i nisim nuntakziate khempeuh huam khin ahi hi. Ngeinain minam  khat leh khat deidanna gamgi ahi lhi. Zomite in ngeina kician mahmah i ngeihna ih minam ki cian khat i hihna hong kipsak hi. Tua ahih manin kawlmite pen Zomi hi ngei lo a, Zomi te zong kawlmite hi ngei lo hi. I Zongeina pen khenpi 3 in khen in kikum leng –

a). A kikhelthei ngeinate: Hih ngeina pen, kipawl khopna a i zat tuamtuamte hi a, tuate pen i pu i pate in kidemna leh gualnopna in a zatte uh ahi hi.

aa). Tonna
bb).Gal aihna
cc). Sa aihna
dd). Zununna cih te dan ahi hi.

Tua ban ah i nisim nuntakna, nek leh dawn , silh leh tente zong kikhel thei lai hi. Christian i suah khit ciangin Tonna leh gal aih sa aih cihte kizang nawn loin tua te taang dingin lungdam kohna, thupha nget na cih bangin atuamtuam te tawh a kikhel bangah, nikten puansilh leh an nek tuidawnte ki khel mahmah hi.

b). A kikhel thei lo ngeina te: Hih te pen, i min phuahzia, unau sung i kimatzia leh, beh leh phung hihna tuamtuam te ahi hi. A hih hangin tuhun ciangin ipu leh i pate min puah bangah, mikang,min kawlte min a beh lap nuam kitam ta a, tua pen minam kician khat a ding leh mihing khat a kingaih sunmite a ding in zat luat loh dingin akilawm ahi hi.  Hih i ngeina kikhelna te pen, i tenna mun, veng leh paam, pilna siamna i zawnna leh sum leh paai i zawnna dung zui-in tampi kikhel hi. Ahi zongin U leh nau sanggam kimat dante kikhel thei khollo lhi.

c). Min Phuahdan:
Zomi te pen sen gam pan kipan a i kepcing gige i ngeina hoih mamah a kician pen khat in “Minphuahdan” ahi hi. Tua min phuah dan pen khang kanna ding leh meltheih u leh nau kizonna dingin a zat nuam mahmah ahi hi. Min phuah dan pen nam 3 bangin kikhen thei a, tua te in.

i). Tual min phuahdan (to name after): Hih pen eima innkuansung eima tate leh tute amin phuah ciangin a kilawm mite in a phuah mite ahi hi. Nupa khat in ta aneih ciangin a tapa masa pen leh atanu masa pen te a pasal i pa leh nu, a nihna pen azi nu leh pa ki pia hamtang hi.

ii). U sung nau sung kimat dan: U sung sanggam, pi leh pu, tanu, tapa leh i kizopdante khempeuh en leng, lai sung ah a ki ciamteh sese loh hangin ngeina kiciantak nei i hih lam kitel mahmah hi. Dahna leh nopna khat peuhpeuh i tuah khak cingin, kuate bangci gamtat ding cih pen gualh deudeu sa in om hi. Gtn: Dahna mun bangah  silung kiim a, tu ding cih ahi zongin, hankuang kua in bawl ding a, a silung kua in puakhia masading, cih dongin a kikhel kikkik den keei kul lo-in a pan mun te golhsa in a om a hi hi.

Conclusion/ Thukhupna:
Ka hun man nading in tu ni a hong kihel thei Yangon teeng Thalmual kipawlna member te leh leengla ong paithei mimal khempeuh tung ah nakpi tak lung dam na ong ko kik nuam ing,2008-09 sangkhak kumsungin  laipil tan 10 ong  Eco Disctinsion ngah khat leh a ong khat gawm 2 in gualzawhna.,lungdampihna laipi le leh,letsong i piaktheih manin zong lungdam ing. Kum ki benglet aa, i vaiham na sungah haksapipi, a khuado pawi i hah bawl na pen ki-it kingaih na leh khualam bang hi leh vok go in ni 4-5 sung bang aki khekleh ngekngek ahih nate ki it na bulphuh a i bawl a hihna hang ahi hi. I Khuado pawibawl na hangin i khua i tui, innkuan khat, pumkhat i hihna hong khangsak henla, khuado pawi hong tun simin hih thute a phawk kik thei tek dingin Topa’n thupha ong pia ta hen.

Dr. Thawng Khan Pau
D.Min., Ph. D (Cand.)
President
Yangon Teng Thalmual Innkuan Kipawlna