Dr. Thawng Khan Pau, D.Min., Ph.D. (Cand.) tangthu atom

User Rating:  / 0

Category: Thalmual

Created on Sunday, 07 March 2010 11:31

Written by Dimboih

Hits: 298

Yangon a EBC pawlpi ah Visiting Pastor ahi Dr. Thawng Khan Pau, D.Min., Ph.D . (Cand.), Thalmual khuami,Gualnam behin Freuary 24,2010 ni-in cinakhol hetlopi in hongnusia ahih manin a kau maciat kidah mahmah hi.

Sia Thawngpau pen kumpi sang pan pilna B.A Degree ngah masa khat ahi hi. Tedim ah  EBC apian khiat akipan pawlpi makai ah kihel den khat hi-in, abeisa 1975 kumin EBC gambup min tawh kihawm khia Cassette lakhui  masa penpen" Maranatha" kici pen a mahmah hanciamna ahi hi. Music tumte zong Burma Young Crusaders tu in Myanmar Young Crusaders (MYC) , Dr. David Yone Mo te ahi hi. Hih pen Zogambup ading lakhui kibawl masa pen pawl hi ding hi.

Tua banah Zomite sungah sum bawl masa hi in, Pasian thupha sangin Tedim khua sungah mihau masa leh a nuamsa a minthang ahi hi. A hauhna banah a tanute bang melhoih in minthang mahmah a, EBC pawlpite in ki angtanpih mahmah ngei uh hi. Gal leh minam zong veii mahmah  in a septheihna bangbang in minam nasem hi.

1988 kumin ZNC hong piang khia a, tua laiah gam leh minam a ding makai lamah kihel pah in minam ading a neihsate pia khia ziahziah hi. Sizungzi in Zogam khua tuamtuam ah ZNC min tawh zinkawi kawi hi. A pianna khua Thalmual ah Motor lampi tunna ding vaihawmna zong a beisa kum 10 val lai a kipan vaihawm in makai hi. Pasian huhna tawh nung kal sung mahmah in Thalmual khua ah Motor Dyna khat tung taktak ta hi.

Khualzin gamvaakna hun hoih phat nawn loh ciangin Tedim pan Yangon ah a beisa 1993 kumin kituah uh hi. 1994 kumin Yangon ah America te sang Grand Rapids Baptist Theological Seminary, Extention Program kahin 1998 kumin M.R.E degree ngah hi. Hih sangah Zomi a kahpih Col. Kampum (hong nusia khin), Zogam Lalpu, Sia Khampeek, Dr. Kham Do Nang, Dr.Lian Za Nang, Sia En Khan Kham leh minam dang tuamtuam tawh kah khawmhi.

A sangkah kawmkawm in Yangon EBC ah Upa sem in hanciam mahmah hi. 2006kum ciangin Asia Pacific Theological  Seminary ah a maban zom to in M.Div  Degree leh D.Min degree te ngah leuleu hi. Tua sang mahah 2007 akipan in Academic Dean ngah hi. Minam leh Pasian nasemte a deihna tawh Zomi sung pan pahtawi huai mi teel khia in Doctorate pahtawina (D.D) piakna Malaysia ah 2008 kumin nei hi.

Tua Doctorate a piak te pen Rev. Dam Suan Mung (Full Gospel Assembly, Pastor, Yangon), Rev. Khai khan Suan (Tedim AG Pastor), Rev.Kam Cin hau (Paradise AG, Mandalay), Sia Dam Khaw Nang, (Yangon) Rev. Cin Sian Pau (SDA, Yangon), Pa Vum Lian Thang (Victory Hotel, Mandalay), Rev. Paul F.John (Immanuel Baptist Church, Yangon), Pu Sangci (SDA, Aizawl) cihte pahtawina D.D pia uh hi.

A mahmah zong APTS sangah a sep kawmin Ph. D hanciam in a sin laitak ahihi. Hih bangin minam leh Pasian a itna tawh i minam Pahtawi huaite pahtawi in ma apan laitak in thakhat hong nusia ahi hi. Khua le tuileh minam sungah panmun tuamtuam zong nei in mipil leh thudot mahmah khat ahi hi.

Kawlpi pan kihawm kalsim Zomi thukizakna Tongsan Weekly Newsletters zong Yangon ading palai leh Consultant of Yangon a sep laitak ahi hi. EBC gambup khawmpi Tahan ah pawisim ding Febraury 24 ni a zin ding kithawi sitset laitak tua zingsang lupna pan thonawn loin ihmu suak ahi hi. Pasian leh minam itin na hoih sem khat ahih manin  leitungnuntakna  a bei ciangin zong sih nuam sa takin Pasian in la ziau ahihi.

Dr. Thawng Pau hong nusiatna hangin minam leh a diakdiak in EBC gambup in supna lianpi kinei cih Tungzang EBC pawlpite' tungah theih huai thu kong pulak hi. A sihni ciang dongah BC gambup ah committee  panmun bulah kikoih den lai ahi hi. A zi leh a tate khempeuh Topan hongkepsak ta hen.

Thupuak,
Dimboih (Muangnu' Nu)
Yangon EBC

Note: Mipi theihbaihpen dingin Dr. Thawng Khan Pau pen Zomi lakah suangbawl minthang masa ahi Pa Pum Za Lian (Thalmual Khua) tawh laiguizom ahihi.