Kumcin Khawmpi ading lasinna nuamtak ki neithei
- Category: Thalmual News
- Created on Wednesday, 11 January 2012 11:42
Topa in cidamna leh hunpha hong piak leh hong tung ding Sen Kumthak (January 24, 2012) ah Kumcin Khawmpi nasia tak bawl nuam ih hih manin akua mapeuh hun awng (OFF DAY) ala khol ciat dingin ih ki zasak phapha hi. Kumdang te sangin a nopci zaw aa bawl nuam ih hih manin mimal kim in ih kihel ciat ding mawhpuak (tawan) ih nei hi. Hih pawipi in Thalmual vontawi te ki lawmtatna leh ankuang umkhopna ban ah Topa thu sungah kha khanlawhna leh pianthakna ahih ding i thunget hi a, NANG ngiat nong kihel loh apha mawh ahi hi. Malaysia sunga om te bek hilo in gamdang tuamtuam aa om khuapih akua mapeuh zong hong kihel nangun itna lianpi tawh kong sam uh hi.
Lasinna Video zong hih link http://goo.gl/FYTNR pan ki enthei dinghi.
Khangnote ki pattahna lam sang ahi music lam leh lasakna te tawh zong hun khat i zat khop theihna dingin January 10, 2012 ni'n PWTC biakinn, Chowkit ah khangno ahi thei tengin lataihna kinei hi. Tumging lam tawh kisai in Tha-Muan (Lead Guitar), D-Thawn (Acoustic Guitar), Thawng Lian (Bass Guitar), E-Thawn (Keyboard), Mungpi (Drum) te ma hong pang ding uh aa, Thalmual Vontawi lia-paal, tangpaal te in phatna late hong zai ziahziah ding uh hi. Tua ban ah Thalmual suan sung pan thugen siam Pastor, Revd, te leh siamna tuamtuam anei te in amau mun ciat panin ma hong pang dinguh ahih manin nasia mahmah ding hi. Thalmual Innkuan Malaysia min tawh ih thoh Tshirt zong anei peuhmah in silh ciat ding hihang.
Hih ni ading zingan (breadfast) aksa cim tawh kisai abei khempeuh ih music makai pipa Thawng Lian in hong sik ding ahih manin lungdam mahmah hang. Tua ban ah sun-an tawh kisai khempeuh zong Pa Kham Suan Khai (apa min Zam Za Kam) in hong vaihawm ding ahih manin nakpi takin lungdam ko hang. Amau hong kipiak khiat nate Topa'n azah tampi in hong thuhsak kik tahen.
Program Time Schedule zong a sawtlo in hong ki khah khia dinga, hunzat dan ding te zong ahoih thei pen dingin ahun zui in hong ki update toto lai ding hi. Hih kumcin khawmpi na pelh khak peuhmah leh hamsia mahmah ding hiteh. Hunla khol in kiging khol in. Thalmual vontawi na hihna hangin kipaak in Topa tung lungdam ko in. Tua in na ma hong vangsak dinga, nang ading thupha hong hi ding hi. Atel siam dingin Topa'n thuphah ong pia ciat tahen!
Na sanggampa,
Tg. Mungtong
TIM President
